भंडारा, २०२५: आगामी २०२६-२७ च्या जातिनिहाय जनगणनेत ओबीसी समाजाच्या आकडेवारीसाठी अधिक स्पष्टता आणि पारदर्शकता असावी, अशी मागणी भंडारा येथील ओबीसी सेवा संघाच्या जिल्हास्तरीय बैठकीत करण्यात आली. २१ जून रोजी शासकीय विश्रामगृहात आयोजित या बैठकीत ओबीसी समाजाच्या विविध प्रश्नांवर आणि शासकीय योजनांवर सविस्तर चर्चा झाली. बैठकीत उपस्थितांनी जनगणनेत प्रत्येक कुटुंबाला “आपण ओबीसी आहात का?” असा थेट प्रश्न विचारावा आणि स्वतंत्र रकान्यात जातीची नोंद करावी, अशी सूचना मांडली. यामुळे ओबीसींची अचूक लोकसंख्या समजेल आणि त्यांच्या संख्येनुसार शिक्षण, नोकरी, आणि योजनांमध्ये योग्य संधी मिळाल्या की नाही, हे तपासता येईल, असे मत गोपाल सेलोकर यांनी व्यक्त केले.

     बैठकीत विदर्भात मंडल यात्रा आयोजित करण्याचा महत्त्वपूर्ण निर्णय घेण्यात आला, ज्यामुळे ओबीसी समाजात जागृती निर्माण होईल. याशिवाय, ओबीसी विद्यार्थी वसतिगृह, ज्ञानज्योती सावित्रीबाई फुले आधार योजना, आणि महाज्योती संस्थेच्या कार्यक्षमतेवर चर्चा झाली. राज्यपुरस्कृत मोदी आवास योजनेचा लाभ ओबीसी आणि एनटी समाजाला मिळावा, यासाठीही मागणी करण्यात आली. भंडारा येथील ओबीसी वसतिगृह सध्या भाड्याच्या इमारतीत चालते, परंतु तिथे मूलभूत सुविधांचा अभाव आहे. यासाठी शासनाने स्वतंत्र इमारत बांधावी, अशी मागणी बैठकीत जोर धरला.

     या बैठकीला ओबीसी सेवा संघाचे जिल्हाध्यक्ष गोपाल सेलोकर, उमेश कोर्राम, संजीव बोरकर, तुळशीराम बोंदरे, ईश्वर निकुळे, गोपाल देशमुख, वसंत काटेखाये, सुभाष उके, वृंदा गायधने, संजीव भुरे, अरुण जगनाडे, श्रीकृष्ण पडोळे, सुभाष पाल, राजेश आजबले, मनोहर टिचकुले, सौरभ देव्हारे, राजू वंजारी, योगेश शेंडे, आणि किशोर डोकरीमारे यांच्यासह अनेक मान्यवर उपस्थित होते. बैठकीच्या शेवटी, ओबीसी समाजावर होणाऱ्या अन्यायाविरुद्ध एकजुटीने लढण्याचा निर्धार व्यक्त करण्यात आला. तसेच, डॉ. बाबासाहेब आंबेडकर, छत्रपती शाहू महाराज, आणि महात्मा फुले यांच्या विचारांतून प्रेरणा घेऊन सामाजिक न्यायासाठी कटिबद्ध राहण्याची शपथ सर्वांनी घेतली.