पुणे : महात्मा ज्योतिबा फुले संशोधन व प्रशिक्षण संस्था, नागपूर (महाज्योती) यांच्यामार्फत इतर मागास वर्ग, विमुक्त जाती, भटक्या जमाती व विशेष मागास प्रवर्गातील विद्यार्थ्यांना पीएच.डी. अभ्यासक्रमासाठी २०२१ मध्ये निवड झालेल्या ६४८ विद्यार्थ्यांना आणि २०२२ मध्ये निवडलेल्या एक हजार २३६ विद्यार्थ्यांना एकूण २४ कोटी १७ लाख ८७ हजार ७४९ रुपये अधिछात्रवृत्ती वितरित केल्याची माहिती 'महाज्योती'ने दिली आहे. उमेदवारांना संशोधनासाठी साहाय्य व्हावे, संशोधन क्षेत्रात संधी मिळावी, या हेतूने 'महाज्योती'तर्फे पीएच.डी. अधिछात्रवृत्ती योजना राबविण्यात येते. विद्यार्थ्यांना अधिछात्रवृत्तीसह घरभाडे, आकस्मिक निधीदेखील देण्यात येतो. मान्यताप्राप्त विद्यापीठातील पदव्युत्तर पदवी परीक्षा उत्तीर्ण झालेल्या विद्यार्थ्यांना पीएच.डी. अधिछात्रवृत्ती योजनेअंतर्गत लाभ घेता येतो. योजनेनुसार नॉनक्रिमिलेअर उत्पन्न गटातील इच्छुक विद्यार्थ्यांकडून 'https :// mahajyoti. org. in' या संकेतस्थळावर ऑनलाइन पद्धतीने अर्ज मागविण्यात येतात. पीएच.डी. अधिछात्रवृत्ती योजनेचा अधिकाधिक विद्यार्थ्यांनी लाभ घेऊन संशोधन कार्यात करिअर घडवावे, असे आवाहन 'महाज्योती'तर्फे प्रकल्प व्यवस्थापकांनी केले आहे.