नागपूर : राज्यातील ओबीसी विद्यार्थ्यांचे प्रश्न, त्यांचे शैक्षणिक हक्क आणि विविध प्रलंबित मागण्यांबाबत शासनाचे लक्ष वेधण्यासाठी सकल ओबीसी महामोर्चाच्या वतीने ३० नोव्हेंबर रोजी नागपुरात भव्य राज्यस्तरीय विद्यार्थी संमेलनाचे आयोजन करण्यात आले आहे. येणारे हिवाळी अधिवेशन लक्षात घेऊन या संमेलनाला विशेष महत्त्व प्राप्त झाले आहे. या अधिवेशनात सरकारने ओबीसी समाजाच्या महत्त्वपूर्ण मागण्यांना मंजुरी द्यावी, या उद्देशाने सुमारे ३ हजार विद्यार्थ्यांची उपस्थिती अपेक्षित आहे.

     या संमेलनात राज्यभरातून महाज्योती संस्थेचे विद्यार्थी, विविध ओबीसी वसतिगृहांमध्ये राहणारे विद्यार्थी तसेच महाविद्यालयांतील विद्यार्थी मोठ्या संख्येने सहभागी होतील. संमेलनादरम्यान ओबीसी विद्यार्थ्यांच्या शैक्षणिक उन्नतीसाठी आवश्यक दिशादर्शन, करिअर मार्गदर्शन, शिष्यवृत्ती योजना, स्पर्धा परीक्षांसाठी उपलब्ध संसाधने आणि शैक्षणिक प्रगतीचे पर्याय अशा अनेक महत्त्वपूर्ण विषयांवर चर्चा होणार आहे.

     सकल ओबीसी महामोर्चाचे समन्वयक उमेश कोर्राम यांनी सांगितले की, “राज्यातील ओबीसी विद्यार्थ्यांच्या प्रलंबित मागण्या तातडीने पूर्ण करणे ही काळाची गरज आहे. विद्यार्थ्यांचे उज्ज्वल भविष्य आणि समान संधी यासाठी शासनाने त्वरित निर्णय घ्यायला हवा. हिवाळी अधिवेशनात सरकारने आमच्या सर्व मागण्यांना सकारात्मक प्रतिसाद द्यावा.”

महामोर्चाच्या प्रमुख मागण्या :

• २ सप्टेंबरचा काळा जीआर त्वरित रद्द करावा.

• महाज्योती संस्थेसाठी किमान १००० कोटी निधी मंजूर करावा.

• महाराष्ट्रातील प्रत्येक जिल्ह्यात आणि तालुक्यात ओबीसी विद्यार्थ्यांसाठी स्वतंत्र शासकीय वसतिगृहांची उभारणी करावी.

• ज्ञानज्योती सावित्रीबाई फुले आधार योजनेअंतर्गत प्रति जिल्हा विद्यार्थ्यांची संख्या ६०० वरून वाढवून ६००० करावी.

• ५०० ओबीसी विद्यार्थ्यांना परदेशी शिक्षणासाठी शिष्यवृत्ती द्यावी.

• इतर मागास आर्थिक विकास महामंडळाला २५ हजार कोटी निधी देण्यात यावा.

• राज्याच्या लोकसंख्येनुसार ओबीसी समाजाला निधीचे प्रमाणबद्ध वाटप करावे.

• ओबीसी विद्यार्थ्यांना १०० टक्के शिष्यवृत्ती देण्याची योजना लागू करावी.

• महाज्योतीच्या २०२३ च्या पीएच.डी. फेलोशिपसाठी नोंदणी तारखेपासून फेलोशिप लागू करावी.

• यूपीएससी, एमपीएससी, पीएच.डी. फेलोशिप योजनांमध्ये महाज्योती संस्थेच्या जागा पूर्ववत कराव्यात.

विद्यार्थी संमेलनात या सर्व मुद्द्यांवर सविस्तर चर्चा होणार असून, संपूर्ण ओबीसी विद्यार्थीवर्गाचा आवाज शासनापर्यंत पोहोचवण्याचा निर्धार या कार्यक्रमातून दिसून येतो. नागपूरच्या पार्श्वभूमीवर होणारे हे राज्यस्तरीय संमेलन ओबीसी विद्यार्थी चळवळीला नवी दिशा देणारे ठरणार आहे.