अमरावती : समाजातील सांस्कृतिक जागृती व परिवर्तनाच्या दिशेने आणखी एक महत्त्वपूर्ण पाऊल उचलत, अमरावती येथे सत्यशोधकी पद्धतीनुसार संपन्न झालेला अस्मीता जामोदकर आणि विशाल अनारसे यांचा साखरपुडा हा समतेची आणि विचारस्वातंत्र्याची नवी घोषणा ठरला. सामाजिक मूल्यांना नवे दिशा देणारा हा सोहळा रविवारी (दि. 5) अत्यंत सोज्वळ आणि प्रेरणादायी वातावरणात पार पडला.

     वधू चि. सौ. का. अस्मीता जामोदकर या मुळच्या राजनापूर्णा (ता. चांदुर बाजार) येथील सत्यशोधकी घराण्यातील आहेत. त्यांच्या वडिलांनी, ज्येष्ठ सत्यशोधक सतीश जामोदकर यांनी पश्चिम विदर्भात सत्यशोधक चळवळीची बीजे रोवण्यात मोठे योगदान दिले आहे. ते सत्यशोधकी साहित्य व सांस्कृतिक संशोधन परिषदेचे माजी अध्यक्ष असून समाजातील वास्तववादी विचारांचे ते निष्ठावान प्रवर्तक आहेत. तर वर चि. विशाल अनारसे हे अहिल्यानगर जिल्ह्यातील अळसुंदे (ता. कर्जत) येथील रहिवासी असून सीनियर इंजिनिअर म्हणून कार्यरत आहेत.

     या सत्यशोधकी साखरपुड्याचे विधीकर्म श्रीगोंदा येथील सत्यशोधक विधीकर्ते भिमराव कोथिंबीरे यांनी पार पाडले. सोहळ्याची सुरुवात महात्मा जोतिराव फुले आणि क्रांतीज्योती सावित्रीबाई फुले यांच्या प्रतिमांचे पूजन व दीपप्रज्वलन करून करण्यात आली. समतेचे प्रतीक म्हणून दोन्ही कुटुंबीयांच्या महिला आणि पुरुषांनी एकत्रितपणे तळी-पाणगे उचलत सत्यशोधकी धार्मिक-सांस्कृतिक पद्धती अभिमानाने जपली.

     साखरपुड्यावेळी निसर्गनिर्मित कृषी संस्कृतीला अधोरेखित करणारी सम-संख्येतील फळफळावळांची आरास ही विशेष आकर्षण ठरली. सत्यशोधकी परंपरेत समतेला दिलेले स्थान यावेळी प्रकर्षाने जाणवत होते.

     कार्यक्रमाला माजी महापौर डॉ. दीपाली गवळी, प्रा. श्रीकांत अनारसे, संजय राऊत, एड. श्रीकांत तायडे, गजानन वाहोकार, प्रल्हाद पाटील पौळकर, गजानन धामणे, रवी सुर्वे यांसारखे अनेक मान्यवर उपस्थित होते. त्यांनी सत्यशोधकी पद्धती ही आजच्या काळाची गरज असल्याचे प्रतिपादन केले. समाजात समानतेचे व स्त्री-पुरुष समत्वाचे मूल्य दृढ करण्यासाठी अशा समारंभांची महत्त्वपूर्ण भूमिका असल्याचे त्यांनी नमूद केले.

     दोन्ही कुटुंबीयांमधील मोठ्या संख्येने उपस्थित सगेसोयरे, नातेवाईक आणि मित्रपरिवार यांच्या उपस्थितीने सोहळा आणखी उत्साहवर्धक ठरला. अनारसे व जामोदकर कुटुंबीयांसह क्षीरसागर कुटुंब, तसेच अनेक विचारवंतांनी नवदांपत्यावर शुभाशिर्वादांचा वर्षाव केला.

     सोहळ्याच्या शेवटी सतीश जामोदकर, सौ. लक्ष्मीबाई जामोदकर आणि एड. अस्तित्व जामोदकर यांनी उपस्थित सर्व मान्यवरांचे मनःपूर्वक आभार मानत सत्यशोधकी मूल्ये पुढे नेण्याचे आवाहन केले.