मराठा ओबीसी आरक्षण आणि हैदराबाद गॅझेटविरोधात ओबीसी संतापले. 

    लातूर, सप्टेंबर २०२५: मराठा समाजाला हैदराबाद गॅझेट लागू करून ओबीसी प्रवर्गात समाविष्ट करण्याच्या शासनाच्या निर्णयामुळे ओबीसींचे २७ टक्के आरक्षण धोक्यात आल्याचा आरोप करत, वांगदरी (ता. रेणापूर) येथील ३५ वर्षीय भरत महादेव कराड याने मांजरा नदीपात्रात उडी मारून आत्महत्या केली. भरतने आत्महत्येपूर्वी एक चिठ्ठी लिहिली, ज्यामध्ये त्याने ओबीसींच्या आरक्षणाच्या संरक्षणासाठी आंदोलनात सहभागी असल्याचे आणि सरकारच्या ओबीसी-विरोधी धोरणांमुळे जीवन संपवत असल्याचे नमूद केले. त्याने आपल्या कुटुंबाला आणि ओबीसी समाजाला न्याय मिळावा, अशी मागणीही चिठ्ठीत केली आहे.

    भरत कराड हा ऑटो आणि इतर वाहनांचा चालक म्हणून काम करणारा तरुण होता. गेल्या अनेक वर्षांपासून तो ओबीसी आरक्षण बचावासाठीच्या प्रत्येक आंदोलनात सक्रिय सहभागी होता. त्याने लिहिलेल्या चिठ्ठीत म्हटले आहे, “मी वेळोवेळी ओबीसी आरक्षण बचाव आंदोलनात सहभाग घेतला. तरीही सरकारने ओबीसी समाजाचा घात करून ओबीसी-विरोधी जी.आर. काढला. त्यामुळे मी माझे जीवन संपवत आहे. माझ्या पाठीमागे माझ्या कुटुंबाला आणि ओबीसी समाजाला न्याय मिळावा.” मराठा समाजाला कुणबी म्हणून ओबीसी प्रवर्गात समाविष्ट करण्याच्या सरकारच्या प्रयत्नांमुळे ओबीसींच्या आरक्षणावर कायमस्वरूपी गदा येईल, अशी भीती त्याने व्यक्त केली होती.

    काल सायंकाळी वांगदरी शिवारातील मांजरा नदीपात्रात भरतने “ओबीसींना आरक्षण मिळालेच पाहिजे, सरकार ओबीसी-विरोधी आहे” अशा घोषणा देत नदीत उडी मारली. यावेळी नदीपात्राजवळ उपस्थित असलेल्या काही तरुणांनी त्याला वाचवण्याचा प्रयत्न केला, परंतु ते यशस्वी झाले नाहीत. भरतच्या मृतदेहाचे शवविच्छेदन करण्यात आले आणि वांगदरी येथे त्याच्यावर अंत्यसंस्कार करण्यात आले. अंत्यसंस्कारावेळी गावकरी आणि परिसरातील नागरिकांनी “ओबीसींना आरक्षण मिळालेच पाहिजे” आणि “भरत कराड यांचे बलिदान वाया जाणार नाही” अशा घोषणा देत शासनाच्या धोरणांचा निषेध केला.

    भरतच्या पश्चात आई, पत्नी, तीन मुली, एक मुलगा आणि १०-२० गुंठे जमीन आहे. सरकारच्या हैदराबाद गॅझेटद्वारे मराठा समाजाला कुणबी म्हणून ओबीसी सवलती देण्याच्या निर्णयामुळे राज्यातील ओबीसी समाजात तीव्र असंतोष पसरला आहे. अनेकांनी शासनावर पक्षपाताचा आरोप केला असून, ओबीसींच्या आरक्षणाचे संरक्षण व्हावे, यासाठी एकजुटीने लढण्याचा निर्धार व्यक्त केला आहे. भरतच्या आत्महत्येने ओबीसी समाजातील तरुणांमध्ये संतापाची लाट पसरली असून, शासनाने तातडीने यावर उपाययोजना करावी, अशी मागणी होत आहे.