लोणंद : सत्यशोधक समाज स्थापनेच्या शतकोत्तर सुवर्ण वर्षपूर्ती व सत्यशोधिका क्रांतीज्योती सावित्रीमाई फुले यांच्या स्मृतिदिनानिमित्त सत्यशोधक समाज महिला संघ यांच्या वतीने पहिले महिला अधिवेशन आयोजित करण्यात आलेले आहे. हे अधिवेशन ज्ञानज्योती सावित्रीबाई फुले यांची जन्मभूमी असलेल्या खंडाळा तालुक्यातील नायगांव येथे घेण्यात येणार आहे. या अधिवेशनास महाराष्ट्रातून सावित्रीच्या लेकी येणार •असून या अधिवेशनातून विचारमंथन घडणार आहे.
रविवार दि. १० मार्च २०२४ रोजी सकाळी ९ वाजता या अधिवेशनास ज्ञानदेवी सावित्रीमाई फुले सभा मंडप, जि.प.प्राथ. शाळेसमोर सुरुवात करण्यात येणार आहे. अधिवेशनाच्या आदल्या दिवशी म्हणजेच शनिवार दि. ९ मार्च रोजी सायंकाळी ७ वाजता अमरावती येथील वैशाली धाकुलकर यांचा मी सावित्री बोलतेय हा एक पात्री प्रयोग कार्यक्रम होणार आहे. रात्री ८ वाजून १५ मिनिटांनी "सावित्रीमाई फुले आजच्या महिलासाठी दिपस्तंभ' या विषयावर व्याख्यान होणार आहे. रात्री ८.३० पासून भोजन असणार आहे. अधिवेशनाच्या दिवशी रविवार दि. १० मार्च २०२४ रोजी सकाळी ८.३० वाजता ह.भ.प. विजय महाराज भोईर रा.शिरूर यांचे सत्यशोधकीय किर्तन होणार आहे. तद्नंतर ९.३० वाजता उद्घाटन प्रसंगी महाराष्ट्र महिला आयोगाच्या अध्यक्षा रुपाली ताई चाकणकर यांच्या हस्ते सत्यशोधक समाजाच्या झेंडयाचे ध्वजारोहण होणार आहे. तसेच प्रमुख अतिथींचा सत्कार व मनोगत होणार आहे. वंदनाताई वनकर यांच्या अध्यक्षीय भाषणाने उद्घाटन सत्राची समाप्ती करण्यात येणार आहे. तसेच ११:३० वाजता महिला गट चर्चा सत्राचे आयोजन करण्यात आलेले आहे. "प्राचीन भारताची क्रांतीकारी महिला कालांतराने गुलाम का झाली ?" या विषयावर महिलांमध्ये गट चर्चा करण्यात येणार आहे. या सत्राची अध्यक्षता छत्रपती संभाजीनगर येथील सुपरिचित व्याख्यात्या अॅड. वैशालीताई डोळस या करणार आहेत. अधिवेशनातील विविध ठराव पारीत केले जाणार आहेत. या सत्राच्या समाप्तीनंतर भोजन असणार आहे.या अधिवेशनात सूत्र संचालन, प्रास्ताविक, आभार तसेच प्रमुख अतिथी व वक्ते या सर्व भूमिका महिला पार पाडणार आहेत. या ऐतिहासिक पहिल्या सत्यशोधक समाजाच्या महिला अधिवेशनास जास्तीत जास्त महिला भगिनींनी सहभागी व्हावे व तन मन धनाने साथ सहयोग देऊन अधिवेशन यशस्वी करावे. अशी विनंती आयोजकांकडून करण्यात आलेली आहे.