चाळीसगाव -  २४ सप्टेंबर हा ऐतिहासिक दुहेरी क्रांती दिन आहे. याच दिवशी इ.स. १६७४ मध्ये छत्रपती शिवाजी महाराजांचा शाक्त पद्धतीने दुसरा राज्याभिषेक झाला आणि बरोबर १९९ वर्षांनी इ.स. १८७३ मध्ये महात्मा जोतीराव फुले यांनी सत्यशोधक समाजाची स्थापना केली. या दोन्ही ऐतिहासिक घटनांच्या ३५२ व्या आणि १५३ व्या वर्धापन दिनाचे औचित्य साधून सत्यशोधक समाज संघाच्या वतीने चाळीसगांव भडगाव रोड येथील महात्मा फुले स्मारक येथे भव्य अभिवादन सभेचे आयोजन करण्यात आले होते. कार्यक्रमाची सुरुवात राष्ट्रमाता जिजाऊ वंदनेने झाली. प्रारंभी छत्रपती शिवाजी महाराज, महात्मा जोतीराव फूले यांच्या प्रतिमांना मान्यवरांच्या हस्ते पुष्पहार अर्पण करून अभिवादन करण्यात आले. त्यानंतर सर्व उपस्थितांनी हातात सत्यशोधक समाजाचा झेंडा घेऊन "जय जिजाऊ, जय शिवराय, जय जोती, जय क्रांती, जय सत्यशोधक" अशा घोषणांनी परिसर दणाणून सोडला.