सांगली: महाराष्ट्र राज्य अंधश्रद्धा निर्मूलन समितीच्या (अंनिस) दोन दिवशीय राज्य कार्यकारिणी बैठकीच्या दुसऱ्या व अंतिम दिवशी सांगलीमध्ये विविध सत्रांचे आयोजन करण्यात आले. या बैठकीत गेल्या दीड दिवसांतील कामाचा सविस्तर आढावा घेण्यात आला, तसेच आगामी काळात संघटना तळागाळापर्यंत पोहोचवून तरुणाई व महिलांचा सहभाग वाढवण्याचा ठाम संकल्प व्यक्त करण्यात आला.
दीड दिवसांच्या कामाचा आढावा आणि संघटना बांधणी समारोप सत्राच्या सुरुवातीला मुक्ता दाभोलकर यांनी बैठकीत पार पडलेल्या कामकाजाचा आणि विविध जिल्ह्यांच्या अहवालांचा सविस्तर आढावा सादर केला. यामध्ये सोलापूर जिल्ह्याने गेल्या सहा महिन्यांत पार पाडलेले १०३ उपक्रम आणि नागपूर शाखेने बसवलेली ५ स्वतःची नाटके यांसारख्या कौतुकास्पद कार्याचा विशेष उल्लेख करण्यात आला.
या बैठकीत आगामी काळातील मोहिमांची घोषणा करण्यात आली. यामध्ये 'फटाकेमुक्त दिवाळी' उपक्रम जोमाने राबवणे, जिल्ह्यांच्या ऑनलाइन बैठका नियमित सुरू ठेवणे, तसेच 'संघटन बांधणी मार्गदर्शिका' ची नवी आवृत्ती कार्यकर्त्यांपर्यंत पोहोचवणे यांसारख्या महत्त्वपूर्ण निर्णयांचा समावेश आहे. राज्यभरातून २० जिल्ह्यांतील सुमारे सव्वादोनशे कार्यकर्ते या बैठकीला उपस्थित होते, तर पुढील बैठकीपर्यंत ३० जिल्ह्यांपर्यंत नेटवर्क वाढवण्याचे ध्येय ठेवण्यात आले आहे.
युवा आणि महिला नेतृत्वावर भर मार्गदर्शन करताना श्रीकांत चिंचोले यांनी स्पष्ट केले की, केवळ व्याख्याने देऊन परिवर्तनाची गाडी पुढे जाणार नाही. व्याख्यानानंतर कॉलेजमधील इच्छुक तरुणांची नावे व संपर्क गोळा करून त्यांच्याशी थेट संवाद साधला पाहिजे आणि त्यांना प्रत्यक्ष चळवळीशी जोडले पाहिजे.
तसेच, या राज्य कार्यकारिणी बैठकीत महिला कार्यकर्त्यांचा आणि पदाधिकाऱ्यांचा मोठा सहभाग पाहायला मिळाला. चळवळीतील महिलांचे वाढते नेतृत्व हे संघटनेच्या निकोप वाढीचे लक्षण असल्याचे वक्त्यांनी नमूद केले.
ऐतिहासिक आठवणी आणि अध्यक्षीय मनोगत संस्थेच्या अध्यक्षा प्रा. प्रमोदिनी मंडपे यांनी आपल्या अध्यक्षीय भाषणात अंधश्रद्धा निर्मूलन चळवळीच्या सुरुवातीच्या काळातील ४० वर्षांपूर्वीच्या आठवणींना उजाळा दिला. डॉ. नरेंद्र दाभोळकर आणि प्रा. एन. डी. पाटील यांच्या विचारांचा आपल्यावर मोठा प्रभाव राहिल्याचे त्यांनी नमूद केले.
१९८५-९० च्या काळात शून्यातून सुरू झालेला हा प्रयोग, साताऱ्यातील १९९० मधील राज्यव्यापी परिषद आणि शिक्षकांसाठी आयोजित करण्यात आलेली प्रशिक्षण सत्रे या सर्व ऐतिहासिक प्रवासाचा आढावा त्यांनी घेतला. पूर्वी कोणतीही साधने नसताना उभी राहिलेली ही चळवळ आज एका मोठ्या वटवृक्षाच्या रूपात विस्तारली आहे, याबद्दल त्यांनी आनंद व्यक्त केला.
'हम होंगे कामयाब'च्या सुराने बैठकीचा समारोप कार्यक्रमाच्या शेवटी सर्व कार्यकर्त्यांनी आणि पदाधिकाऱ्यांनी हातात हात घालून 'हम होंगे कामयाब' हे स्फूर्तीगीत गायले आणि सामाजिक परिवर्तनाचा व वैज्ञानिक दृष्टिकोन रुजवण्याचा लढा आयुष्यभर सुरू ठेवण्याची प्रतिज्ञा घेतली.
या समारोप सत्राला संस्थेच्या अध्यक्षा प्रा. प्रमोदिनी मंडपे, विश्वस्त माणगावे सर, मुक्ता दाभोलकर, डॉ. हमीद दाभोलकर, फारूक गवंडी, राहुल थोरात, सुहास भिंगे यांच्यासह सांगली जिल्ह्यातील व राज्यभरातील प्रमुख कार्यकर्ते आणि पदाधिकारी मोठ्या संख्येने उपस्थित होते.