नांदेडच्या पीपल्स कॉलेज परिसरात साहित्यिकांची उपस्थिती; डॉ. जगदीश कदम अध्यक्षस्थानी
नांदेड : अभिदा प्रकाशन, नांदेड यांच्या वतीने कवयित्री उज्ज्वला पडलवार यांच्या ‘विद्रोह प्रेमाचा’ या कवितासंग्रहाचा प्रकाशन सोहळा रविवार, ४ ऑक्टोबर रोजी आयोजित करण्यात आला आहे. नांदेड एज्युकेशन सोसायटीच्या पीपल्स कॉलेज परिसरातील मल्टीमीडिया हॉलमध्ये सकाळी ११.३० वाजता हा साहित्यिक कार्यक्रम होणार आहे.
या प्रकाशन सोहळ्याच्या अध्यक्षस्थानी ज्येष्ठ साहित्यिक डॉ. जगदीश कदम राहणार आहेत. डॉ. प्रविण पाटील यांच्या हस्ते ‘विद्रोह प्रेमाचा’ या कवितासंग्रहाचे प्रकाशन करण्यात येणार आहे. प्रसिद्ध कवी केशव खटिंग हे कार्यक्रमाचे प्रमुख वक्ते म्हणून उपस्थित राहणार असून, कॉ. विजय गाभणे यांची प्रमुख अतिथी म्हणून उपस्थिती राहणार आहे.
कवयित्री उज्ज्वला पडलवार यांच्या या कवितासंग्रहाच्या निमित्ताने नांदेडमधील साहित्यिक आणि रसिकांना एका महत्त्वपूर्ण साहित्यिक कार्यक्रमाचा अनुभव घेता येणार आहे. कविता, साहित्य आणि सामाजिक जाणिवांच्या विविध पैलूंवर या निमित्ताने विचारांची देवाणघेवाण होण्याची अपेक्षा आहे.
या कार्यक्रमाचे आयोजन प्रा. डॉ. विजया भारत दाढेल, प्रकाशिका, अभिदा प्रकाशन यांनी केले आहे. साहित्य क्षेत्रातील विविध मान्यवरांची उपस्थिती या सोहळ्याला लाभणार आहे.
प्रकाशन सोहळ्यास प्रा. डॉ. भगवान सूर्यवंशी, कॉ. गंगाधर गायकवाड, डॉ. आदिनाथ इंगोले, प्रा. शरद वाघमारे आणि सुनील अनंतवार यांनी उपस्थित राहण्याचे आवाहन केले आहे. साहित्यप्रेमी, कवी, लेखक आणि रसिकांनी या कार्यक्रमास उपस्थित राहावे, असे आयोजकांच्या वतीने कळविण्यात आले आहे.