नांदेड, २०२५: नांदेड येथील कामगार चळवळीतील लढाऊ नेत्या कॉ. उज्वला पडलवार यांना शेतकरी कामगार पक्षातर्फे (शेकाप) क्रांतिसिंह नाना पाटील राज्यस्तरीय पुरस्काराने सन्मानित करण्यात आले आहे. हा पुरस्कार सोहळा बीड येथील यशवंतराव चव्हाण नाट्यगृहात रविवारी (३ ऑगस्ट २०२५) शेकाप आणि क्रांतिसिंह नाना पाटील शेतकरी विकास प्रतिष्ठान यांच्या संयुक्त विद्यमाने आयोजित करण्यात आला. या कार्यक्रमात दहा निवडक व्यक्तींना त्यांच्या सामाजिक आणि कामगार क्षेत्रातील योगदानासाठी गौरविण्यात आले, ज्यामध्ये कॉ. पडलवार यांचा समावेश आहे. सेंटर ऑफ इंडियन ट्रेड युनियन (सीटू) च्या राज्य सचिव आणि नांदेड जिल्हाध्यक्ष असलेल्या पडलवार यांच्या कार्याची पावती म्हणून हा पुरस्कार आहे, असे सीटू जिल्हा जनरल सेक्रेटरी कॉ. गंगाधर गायकवाड यांनी सांगितले.
या पुरस्कार सोहळ्याचे आयोजन शेकाप नेते भाई मोहन गुंड यांनी केज येथून बीड येथे आणले, ज्याचे सर्वत्र कौतुक होत आहे. कार्यक्रमात क्रांतिसिंह नाना पाटील आणि लोकशाहीर अण्णाभाऊ साठे यांच्या जयंतीनिमित्त अभिवादनही करण्यात आले. कार्यक्रमाच्या अध्यक्षस्थानी खासदार बजरंग सोनवणे उपस्थित होते, तर शेकापच्या राज्य चिटणीस मंडळाच्या सदस्या चित्राताई गोळेगावकर आणि प्रा. उमाकांत राठोड यांच्या हस्ते ध्वजारोहण झाले. कॉ. पडलवार यांनी अनेक यशस्वी आंदोलने आयोजित करून कामगार आणि कष्टकऱ्यांना न्याय मिळवून दिला आहे. त्यांचा जन्मदिवस ४ ऑगस्ट रोजी असून, त्याच्या आदल्या दिवशी पुरस्कार मिळाल्याने सर्व स्तरांतून त्यांच्यावर शुभेच्छांचा वर्षाव होत आहे.
या सोहळ्यात ज्येष्ठ नेत्या सुशिला मोराळे, माजी आमदार उषा दराडे, शेकाप जिल्हा चिटणीस भाई विष्णूपंत घोलप, राजकुमार घायाळ (हमाल मापाडी महामंडळ), ॲड. अजय बुरांडे (माकप), इकबाल पेंटर, चंद्रकांत चव्हाण (शिक्षक आघाडी), भाऊराव प्रभाळे (भाकप), राजेश घोडे (आझाद क्रांती सेना), रोहिदास जाधव (एसएफआय), प्रा. पंडित तुपे (युक्रांद), गणेश मस्के (संभाजी ब्रिगेड), ॲड. राहुल वायकर (विभागीय संभाजी ब्रिगेड), नितीन सोनवणे (पँथर सेना), सुभाष लोणके (डीपीआय), ॲड. शिवाजी कांबळे (समाजवादी पक्ष), आणि अशोक येडे (आप) यांच्यासह अनेक मान्यवर उपस्थित होते. क्रांतिसिंह नाना पाटील यांचे क्रांतिकारी कार्य आणि सामाजिक न्यायासाठी योगदान चंद्र-सूर्यापर्यंत जनमानसात प्रेरणा देत राहील, असे गायकवाड यांनी नमूद केले. कॉ. पडलवार यांच्या या सन्मानाने नांदेडच्या कामगार चळवळीचा गौरव झाल्याची भावना व्यक्त होत आहे.